Amazon kupuje lanac prodavnica zdrave hrane

17. Jun 2017. | 10:11 | NV
Whole_Foods

Svjetski gigant za prodaju robe preko interneta i za njenu dostavu, američki Amazon, saopštio je da će za 13,7 milijardi dolara kupiti firmu koja ima lanac prodavnica hrane Whole Foods, čime širi svoju ekonomsku imperiju.

Taj lanac piljarnica-samousluga, osnovan 1980. godine koji prodaje “zdravu hranu”, posluje u SAD, Kanadi i Velikoj Britaniji, ali mu u posljednje dvije godine opada prodaja.

Transakcija će biti sprovedena u drugoj polovini godine. Lanac za prodaju “zdrave hrane” će zadržati naziv i na čelu će mu ostati dosadašnji vlasnik, osnivač John Mackey.

Amazon koji je na početku bio internet knjižara, zatim prodavac kompjuterskih igara i programa, a sada i kompanija za skladištenje podataka “u oblaku” (Cloud computing), postao je najveća svjetska maloprodajna firma uz korištenje elektronske trgovine preko interneta, proširivši ponudu elektronikom, opremom za domaćinstvo, odjećom, hranom, igračkama, nakitom.

Amazon je i najvrijednija javna kompanija na svijetu, s prihodom od 136 miijardi dolara 2016, a ima i više od 340.000 službenika u SAD i širom svijeta.

 

NV / Beta

Na vrh